Makosa Matatu Yanayowakosesha Wafanyabiashara Wengi Faida

Ukuaji wa biashara yoyote unategemea na mzunguko wa fedha kwenye biashara hiyo. Kama mzunguko wa fedha siyo mzuri biashara haiwezi kukua. Kama mzunguko wa fedha upo vizuri biashara itakua na kutengeneza faida.

Biashara inaposhindwa kutengeneza faida inaelekea kufa. Kuna sababu nyingi ambazo wafanyabiashara wanaweza kutafuta kwa nini biashara zao zinakufa. Na mara zote sababu hizi huwa zinakuwa ni za nje. Mambo kama uchumi haupo vizuri au mabadiliko mengine yamekuwa ndiyo kisingizio cha biashara kushindwa kufanya vizuri.

Vipi kama leo nikakuambia kwamba kama biashara yako haifanyi vizuri basi wewe ndiye unayeifanya biashara hiyo ishindwe kwenda vizuri? Utakubali au utakataa? Kabla hujajipendelea au kujiumiza, angalia sababu hizi tatu ambazo zinapelekea biashara nyingi kufa na uone kama kuna ambazo umekuwa unafanya kwenye biashara yako.

Sababu ya kwanza; kutokujua kwa hakika ni kitu gani unachouza.
Wafanyabiashara wengi wamekuwa na ile dhana kwamba fungua biashara na watu wakikuona watakuja kununua. Wanaweza kukuona na kuja kununua, lakini wasirudi tena. Mteja anapokuja kununua kwako mara moja na asije tena ni dalili mbaya kwa biashara yako.

Mteja anataka kwenda kwenye biashara ambayo yule anayemhudumia anajua kwa hakika ni kitu gani anachokifanya. Hili linafanywa na wafanyabiashara wachache mno, wengi wanaendesha biashara zao kwa mazoea. Wanashindwa kuwashawishi wateja wao kwa nini wanunue kutoka kwao, kwa sababu hawajui kwa hakika ni namna gani mteja anaweza kunufaika na kile wanachouza.

Sababu ya pili; kutokujua mteja hasa wa biashara yako ni nani.
Dhana ile ile ya kwamba fungua biashara na watu wataiona, ndiyo imekuwa inatumika kwamba mteja wa biashara yako ni mtu yeyote. Sikiliza nikuambie, hakuna biashara ambayo mteja wake ni kila mtu. Kila biashara ina aina fulani ya wateja wake, ambao ukishawajua hawa kwenye biashara yako unaweza kuwafikia vizuri na kukuza biashara yako.

Usikazane kumfanya kila mtu awe mteja wako, bali angalia wale ambao wanaweza kunufaika na kile unachotoa na kisha hakikisha hao ndiyo unawafikia vizuri na kufanya nao biashara.

Sababu ya tatu; kuchelewa kubadilika.
Biashara ambazo zilikuwa zinavuma sana miaka kumi iliyopita sasa hivi nyingi hazipo. Biashara tunazoona leo ndiyo bora sana, miaka kumi ijayo zinaweza zisiwepo kabisa. Unachopaswa kuelewa ni kwamba mabadiliko yanatokea, na yanatokea kwa kasi kubwa sana. Wafanyabiashara wanaoshindwa kwenda na kasi hii ya mabadiliko yanawaacha nyuma na kushindwa kukuza biashara zao.

Unapokuwa mfanyabiashara, unahitaji kuwa karibu sana na biashara yako, hapa ndipo unapoweza kuyaona mabadiliko yanayoathiri biashara yako moja kwa moja.

Wewe kama mpenda biashara, hakikisha mambo haya matatu hayawi kikwazo kwenye ukuaji wa biashara yako.